ياسين منصور: الأهلي المصري مكانه يلعب في بطولات الاتحاد الأوروبي

كشف الملياردير المصري ياسين منصور، عن أسباب ترشحه على منصب نائب رئيس النادي الأهلي ضمن قائمة محمود الخطيب، وذلك في الانتخابات المقرر لها يوم 31 أكتوبر المقبل.

وقال ياسين منصور في تصريحات تليفزيونية: "قررت الترشح في انتخابات الأهلي لأكثر من سبب ومنها أسباب شخصية، ولكي أكون نائب رئيس الأهلي الأمر سيكون بحاجة إلى التفرغ، وحاليًا نجلي انضم لأعمالي، لذلك رأيت أن الوقت الحالي هو الأنسب لترشحي في انتخابات الأهلي".

وأوضح: "الخطيب أسطورة كروية مصرية وأهلاوية، ولما اتقاله إنه تعبان ولازم يرتاح كان هناك مفاضلة إني أكون الرئيس أو النائب، لكنى قولت للخطيب: لازم تكون الرئيس أنا مقدرش أجي من برة مرة واحدة، على الأقل محتاج من 3 إلى 6 أشهر أعرف إيه اللي جوة".

وواصل: "أنا محتاج وقت لفهم أمور النادي وأخد قرارات على أساسها، وأنا بحلم إن كل واحد في الأهلي يكون عنده مؤشر أداء معين يتم محاسبته عليه، ويكون عارف المطلوب منه بالظبط والمفروض يأديه ونشوف أحدث ما وصل فيه العالم في الإدارة الرياضية ونطبقه هنا".

وأكمل ياسين منصور تصريحاته: "أنا شايف الأهلي ما يلعبش في إفريقيا، ومكانه يلعب في أوروبا وفي دوري الأبطال وبطولات الاتحاد الأوروبي، الأهلي علامة تجارية في الشرق الأوسط، وأنا شايفها علامة رهيبة، وأولاد الأهلي لهم طبيعة خاصة إن دائمًا الأهلي هو الأهم مش أنا هاعمل إيه؟ وشغلتي إيه؟".

واختتم ياسين منصور تصريحاته: "أنا بشجع الأهلي من عمر 4 سنين، وكنت بروح ماتشات الأهلي لما ييجي يلعب في الإسكندرية واتضربت كتير من مشجعي الاتحاد لكن كملت حب الأهلي".